• 20.04.2021 13:56

САРИСА

Прв македонски конзервативен портал

Анализа на Јане Јанчески: Користење на отворени извори на податоци

BySarissa Editor

Dec 6, 2020
Јане Јанчески

Прибирањето податоци од јавни или отворени извори стана еден од методите кои се широко користени во денешната работа на новинарските агенции, детективските агенции, компаниите кои работат приватно разузнавање, но и органите на државната управа кои се занимаваат со безбедносно-разузнавачка работа. Овој метод на прибирање податоци е само еден дел од арсеналот на погоре споменатите ентитети, но слободно може да се каже дека е и еден од најекономичните и најмногу користени, и во кохезија со другите методи на прибирање податоци може да не однесе кон комплетирање на сликата за нашиот предмет на интерес.

Прибирањето податоци од отворени извори е процес што претставува предизвик и кој мора да биде добро усовршен со цел да се добијат кредибилни завршни информации и сознанија. Во исто време мораме да се погрижиме дека ќе се соберат доволно податоци за да се покријат сите аспекти на темата или темите што ќе бидат анализирани, но истовремено мораме и да одбегнеме пренатрупување со податоци или собирање на непотребни или несоодветни податоци. Со огромниот број информации што кружат и што се достапни на социјалните мрежи, во јавните бази на податоци и преку други отворени извори, клучно е да се поседуваат вештини и знаење потребни за пребарување, истражување и верификација на тие податоци, за да се искористат на прецизен и корисен начин.

Клучно за овој метод е лицата кои го користат да имаат познавања за постоењето, релевантноста, достапноста и веродостојноста на сите отворени извори што се одбрани за конкретна задача на собирање, како и познавањето на евентуалните правни ограничувања и барања за одобрување што се применуваат за користење на различните видови на извори на податоци. Познавањето на ограничувањата и можноста за пристап кон изворите се предуслови за делотворното собирање и анализа на податоците.

Новинарите, активистите за човекови права, детективите, приватните фирми за разузнавање и други лица постојано користат отворени податоци, кориснички содржини и други податоци од отворени извори во креирањето на извонредно значајни истражувања во сите области, од конфликтни зони до случаи на злоупотреби на човековите права, политичка и меѓународна корупција.

Информациите од отворени извори кои се слободно достапни за сите преку Интернет, на пример, преку Фејсбук, Инстаграм, Гугл мапс и преку други отворени јавни бази на податоци, овозможија секој да може да собира податоци и да врши проверки за други лица (на пример преку мрежите на социјалните медиуми). Изобилството информации од отворени извори достапни на Интернет и во базите на податоци значи дека денес секое можно истражување треба да вклучи и пребарување, собирање и верификација на податоци од отворени извори. Тоа стана неодвоиво од работата на култивирање на изворите, обезбедување податоци и други истражувачки тактики што се базираат врз скриени или помалку познати податоци. Новинарите, детективите, оперативците и други лица што ја развиваат и ја одржуваат способноста за правилно пребарување, откривање, анализа и верификација на одредени податоци, мора постојано да ги усовршуваат своите вештини, но и да се обучат за користење на различни софтвери кои се специјално дизајнирани за пребарување низ големи бази на податоци, за да ги најдат токму клучните податоци кои се потребни за одредено истражување.